ЦУВРАЛ №1
ДААНАЙГИЙН ЭНХТУЯА – “УЛСЫН БҮРТГЭЛ БОЛ МИНИЙ ШҮТЭЭН”
(Увс аймгийн Улсын бүртгэлийн хэлтсийн анхны дарга, 2009–2014)
– Таны хувьд “Улсын бүртгэлийн хэлтэс” байгуулагдсан тэр үеийн уур амьсгалыг хэрхэн дурсдаг вэ?
“2009 он — Монгол Улсад бүртгэлийн тогтолцоог нэгтгэх том зорилт тавигдсан үе.
Увс аймагт ч бас энэ шинэ бүтцийг байгуулж, гурван бүртгэлийн байгууллагыг нэгтгэх үүрэг ирсэн.
Тэр үед бид хүйтэн, жижиг өрөөнд багтаж ядан хуралддаг байлаа.
Хүн бүрийн сэтгэл, зүтгэл, итгэлцэл л энэ байгууллагын суурийг тавьсан гэж боддог.”
– Тухайн үед тулгарч байсан хамгийн том сорилт юу байсан бэ?
“Орчин нөхцөл, байр, техник гээд бүх зүйл дутуу байсан.
Гэхдээ зорилго байсан – бүртгэлийн ажлыг нэгтгэж, иргэн бүрийн мэдээллийг хариуцлагатай болгож өгөх.
Бид хөлдсөн компьютертэй, цахилгаан тасарсан орчинд ч ажлаа зогсоолгүй хийдэг байлаа.
Тэр бүхнийг өнөөдөр бодоход бахархал төрдөг.”
– Увс аймаг анхны өөрийн байртай болсон нь том дэвшил байсан. Тэр үеийн дурсамжаасаа хуваалцана уу?
“Тийм ээ, 2013 онд Монгол Улсад аймгууд дундаа анхны Улсын бүртгэлийн барилгыг ашиглалтад оруулсан нь бидний хамгийн том бахархал.
16 машины гражтай, архивын зориулалттай хоёр давхар байр — тэр бол олон жилийн хүсэл мөрөөдлийн биелэл байсан.
Тухайн үеийн Ерөнхий сайд Н.Алтанхуяг, төрийн байгууллагуудын дэмжлэгтэйгээр энэ бүтээн байгуулалтыг хийж чадсан.”
– Танай хамт олон ямар үнэт зүйл дээр нэгдэж байсан бэ?
“Бидэнд хамгийн чухал нь эв нэгдэл байсан.
Хэн нь ч ‘энэ миний ажил биш’ гэж хэлдэггүй байлаа.
Аймгийн 19 сумын бүртгэгч нартайгаа хамтдаа нэг гэр бүл шиг хөдөлмөрлөсөн.
Тиймээс Увс аймаг дараа дараагийн жилүүдэд улсын хэмжээнд тэргүүлэгч аймгаар шалгарч чадсан.”
– Та байгууллагынхаа түүхэнд ямар ул мөр үлдээсэн гэж боддог вэ?
“Улсын бүртгэлийн хэлтсийн анхны бүтэц, байр, цахим бүртгэлийн суурийг тавьсан минь миний нэрийн хуудас гэж боддог.
Хийсэн ажилтай, хэлэх үгтэй, ‘Улсын бүртгэлийн анхны дарга’ гэсэн нэрээрээ бахархдаг.
Би ажилдаа зүрх сэтгэлээ шингээсэн учраас энэ байгууллага миний хувьд шүтээн болсон.”
– Залуу Улсын бүртгэгчдэд хандаж юу хэлэх вэ?
“Ажил бол зөвхөн үүрэг биш, зүтгэл.
Бүртгэл гэдэг бол итгэл, хариуцлага хоёрын нэгдэл.
Тиймээс залуус минь ажилдаа сэтгэлээ шингээ, иргэн бүрийн итгэлийг хамгийн өндөрт тавь.”
#85ЖилБүртгэлийнТүүх
#АнхныДарга #УвсАймаг #БүртгэлийнГэрБүл #ЭнхтуяаДарга #БүртгэлМинийШүтээн
